Psalmus. Miserere mei Deus [sarum-miserere]
Ps. Miserére mei Deus tota psalmus dicatur sine nota cum Glória Patri et Sicut erat.
- Miserére mei Deus : secúndum magnam misericórdiam tuam.
- Et secúndum multitúdinem miseratiónum tuárum : dele iniquitátem meam.
- Ámplius lava me ab iniquitáte mea : et a peccáto meo munda me.
- Quóniam iniquitátem meam ego cognósco : et peccátum meum contra me est semper.
- Tibi soli peccávi, et malum coram te feci : ut justificéris in sermónibus tuis, et vincas cum judicáris.
- Ecce enim, in iniquitátibus concéptus sum : et in peccátis concépit me mater mea.
- Ecce enim, veritátem dilexísti : incérta et occúlta sapiéntie tue manifestásti michi.
- Aspérges me ysópo, et mundábor : lavábis me, et super nivem dealbábor.
- Audítui meo dabis gáudium et letíciam : et exsultábunt ossa humiliáta.
- Avérte fáciem tuam a peccátis meis : et omnes iniquitátes meas dele.
- Cor mundum crea in me, Deus : et spíritum rectum ínnova in viscéribus meis.
- Ne projícias me a fácie tua : et spíritum sanctum tuum ne áuferas a me.
- Redde michi letíciam salutáris tui : et spíritu principáli confírma me.
- Docébo iníquos vias tuas : et ímpii ad te converténtur.
- Líbera me de sanguínibus, Deus, Deus salútis mee : et exsultábit lingua mea justíciam tuam.
- Dómine, lábia mea apéries : et os meum annunciábit laudem tuam.
- Quóniam si voluísses sacrifícium dedíssem : útique olocáustis non delectáberis.
- Sacrifícium Deo spíritus contribulátus : cor contrítum et humiliátum Deus non despícies.
- Benígne fac Dómine in bona voluntáte tua Sion : ut edificéntur muri Hierúsalem.
- Tunc acceptábis sacrifícium justície, oblatiónes, et olocáusta : tunc impónent super altáre tuum vítulos.
- Glória Patri et Fílio : et Spirítui Sancto.
- Sicut erat in princípio et nunc et semper : et in sécula seculórum, Amen.